မုန်တိုင်းဒဏ်ဆိုးဝါးစွာ ခံစားရသည့်ဒေသများရှိ စာသင်ကျောင်းများကို တခြားဒေသများနည်းတူ ဇွန်လ ၂ ရက်နေ့တွင် ပြန်လည်ဖွင့်လှစ်ခဲ့ရာ နေရာ မလုံလောက်မှုကြောင့် ကျောင်းသားများမှာ ခက်ခဲစွာ စာသင်ကြားနေကြရသည်ကို တွေ့ရှိရသည်။
ရန်ကုန်တိုင်း ကွမ်းခြံကုန်းမြို့နယ် မန်းကလိပ်ကျေးရွာ အုပ်စု ရှိ မူလတန်းလွန်ကျောင်းတွင် ၁၂ပေx၂၀ပေနှင့် အမြင့် ၅ပေ ခန့်ရှိသည့် အဖြူရောင် ရွက်ဖျင်တဲအတွင်း ကျောင်းသားများ စာသင်ကြား နေကြရသည်ကို တွေ့ရသည်။အဆိုပါရွက်ဖျင်တဲမှာ ဆော်ဒီအာရေဗျနိုင်ငံမှ လှူဒါန်းထား ခြင်းဖြစ်ပြီး တဲ အလုံး ၃၀၀ဖြစ်သည်ဟု နိုင်ငံတကာ အန်ဂျီအို အဖွဲ့ တဖွဲ့၏ တာဝန်ခံတဦးက ပြောဆိုသည်။ ရွက်ဖျင်တဲကို မြေကြီးပေါ်တွင် ထိုးထားခြင်းဖြစ်ပြီး မိုးရွာ သည့်အခါ ရေ မမြုပ်စေရန် အုတ်နီခဲများ ခင်းထားသည် ကိုလည်းတွေ့ရသည်။
ကော့မှူးမြို့နယ် ကွမ်းခြံကုန်း-ရန်ကုန် ကားလမ်းဘေး ရှိကျေးရွာ မူလတန်းကျောင်းတွင်လည်း ပြိုပျက်သွား သည့် ကျောင်းအဆောက်အဦမှ သွပ်မိုးကိုဝါးညှပ်ကာ ယာယီမိုး ထားသည့် တဲထဲတွင် ကျောင်းသားများ အကာမဲ့စွာ စာသင် ကြားနေကြရသည်ကို တွေ့မြင်ရသည်။
ကွမ်းခြံကုန်းမြို့နယ်အတွင်းရှိ ကျေးရွာများမှ မူလတန်း ကျောင်းများတွင် မူလတန်းပညာရေးမှာ အခမဲ့ပညာရေး ဖြစ်သည် ဆိုသည့် စာတန်းကိုချိတ်ဆွဲကာ ကျောင်းအပ် လက်ခံသော်လည်း ဖတ်စာစာအုပ်များမှာ တစုံလျင် ကျပ် တထောင်၊ တထောင့်ငါးရာ စသဖြင့် အတန်းပေါ်မူတည်ပြီး ၀ယ်ယူရခြင်းဖြစ်သောကြောင့် ကျောင်းသာမိဘတချို့မှာ ယခုလိုကာလ တွင် ၀ယ်ယူရန်မတတ်နိုင်ကြဟုလည်း အဆိုပါ ရွာများတွင် သွားရောက် ကူညီဆောင်ရွက်ပေးနေသည့် ရန်ကုန်မြို့ခံတဦး ကပြောဆိုသည်။
ကွမ်းခြံကုန်းမြို့မှ ၃မိုင်ကျော်ဝေးသည့် ရွာအထက်တန်းကျောင်း တကျောင်းတွင် တပိုင်းပြိုကျသွားသည့် ကျောင်းဆောင်နှင့် ခေါင်မိုးလွင့်သွားသည့် အပိုင်းတို့ကို ပြန်လည်မပြုပြင်ရသေးဘဲ အပျက်အစီးကြားထဲတွင် ကျောင်းသားများ စာသင်ကြားနေကြရသည်။
သွပ်ပြန်မမိုးရသေးသည့် နောက်ကျောင်းဆောင်တဆောင်အား နိုင်ငံတကာမှ ကူညီသည့် စစ်စိမ်းရောင် တာလပတ်ဖျင်ကို ၀ါးဖြင့် ယာယီညှပ်မိုးထားသည်ဟု အဆိုပါရွာမှ ရွာခံတဦးကပြောပြသည်။
မိုးရွာလျင် အမိုးမှရေစိမ့်ယိုသည့်အတွက် စာသင်ခန်းထဲတွင် ထီးဆောင်းနေကြရပြီး စာသင်ကြားနိုင်ခြင်းမရှိဟုလည်း ၎င်းက ပြောသည်။
ကွမ်းခြံကုန်းမြိ့ရှိ အထက်တန်းကျောင်းအဆောက်အဦများ ကိုသာ အဆိုပါနယ်မြေတွင် တာဝန်ယူထားသည့် အေးရှား ဝေါလ်ကုမ္ပဏီမှ ဦးစားပေးပြင်ဆင်ခဲ့သော်လည်း ကားလမ်းဘေးရှိ မူလတန်းကျောင်းတချို့မှာ ယခုတိုင် မပြင်ဆင်နိုင် သေးသည်ကို တွေ့ရှိရသည်။
မုန်တိုင်းဒဏ် ခံရသော ဟိုင်းကြီးကျွန်းမြို့နယ် အတွင်းရှိ ကျောက်ချောင်းကျေးရွာတွင်မူ အဆောက်အဦ မလုံလောက်ခြင်း ကြောင့် တနေ့လျင် နှစ်ချိန်တက်သောကျောင်းအဖြစ် ပြောင်းလဲကာ ယခုလ ၆ ရက်နေ့မှ စတင် ဖွင့်လှစ်ခဲ့သည်ဟု အဆိုပါ ရွာမှ ပြန်လာသူတဦးက ပြောသည်။
မုန်တိုင်းဒဏ်ကြောင့် ဧရာဝတီတိုင်းနှင့် ရန်ကုန်တိုင်းတို့မှ ဆိုးရွားစွာ ပျက်စီးသွားခဲ့သည့် စာသင်ကျောင်းများ အားလုံးကို နဂိုအနေအထားဖြစ်စေရန် ပြန်လည် ပြင်ဆင်နိုင်ခြင်းမရှိသေးသော်လည်း အစိုးရက အခြေခံပညာ ဦးစီးဌာန (အောက် မြန်မာပြည်) မှ မြို့နယ်ပညာရေးမှူးများသို့ တတ်နိုင်သမျှ စောလျင်စွာ ကျောင်းပြန်ဖွင့်ရန် ညွှန်ကြားချက်များကို ပေးပို့ထား သည်ဟု ပညာရေးဝန်ထမ်းတဦး က ပြောဆိုသည်။
နအဖ စစ်အစိုးရကမူ မုန်တိုင်းဒဏ်ခံရသည့် ဒေသများတွင် ကယ်ဆယ်ရေးလုပ်ငန်းများ ပြီးစီး၍ ပြန်လည်ထူထောင်ရေး လုပ်ငန်းများ လုပ်ဆောင်နေပြီဖြစ်ကြောင်း နိုင်ငံပိုင်သတင်းစာများတွင် မကြာခဏ ဖေါ်ပြလေ့ရှိသည်။
Source
No comments:
Post a Comment