နန်းဒေဝီ ဗုဒ္ဓဟူးနေ့၊ မေလ 07 2008
ဆိုင်ကလုံးမုန်တိုင်းအပြီး အဓိကပွဲရုံတွင် ဆန်ပြတ်နေ
နယူးဒေလီ။ ။ ရန်ကုန်နေ ပြည်သူများအဖို့ အင်္ဂါနေ့က ဆန်နှင့် အခြားကုန်စည်များ ပြတ်လပ်နေပြီး ပုံမှန်နှုန်းထက် ၂ ဆကျော် ပေးဝယ်နေရသည်။
“ကျမ ဘုရင့်နောင် ပွဲရုံမှာ ဆန်သွားဝယ်တာ ပုံမှန်နှုန်းထက် ၂ ဆကျော် ပေးဝယ်ခဲ့ရတယ်။ ကုန်ပစ္စည်း အားလုံးလိုလို ဈေးတက်သွားတယ်။ မယုံနိုင်အောင်ပါပဲရှင်” ဟု ရန်ကုန် ဆင်ခြေဖုံးတွင် နေထိုင်သူ ဒေါ်ချင်းက မြို့တော်၏ အဓိက ဆန်ဈေးကွက်ကို ရည်ညွှန်းပြောသည်။
ဆိုင်ကလုံးမုန်တိုင်း တိုက်ခတ်အပြီး ဆိုင်အတော်များများ ပိတ်ထားကြပြီး ဆိုင်အချို့သာ ဆန်ကို အကန့်အသတ်ဖြင့် ရောင်းချနေကြသည်။ “ကျမတို့ ရပ်ကွက်မှာ လုမှာကြောက်လို့ ဆိုင်တွေက ပိတ်ထားကြတော့ ဆန်ဝယ်လို့ မရဘူးလေ” ဟု ဒေါ်ချင်းက ဆက်ပြောသည်။
ယခင်က ကျပ် ၁၃ဝဝဝ တန်ကြေးရှိသည့် ဆန်တအိတ်သည် ဆိုင်ကလုံးမုန်တိုင်း ကျပြီးနောက် ယခုအခါ ကျပ် ၃၁ဝဝဝ ပေးဝယ်နေရသည်။
“ဆန်အညံ့စားပဲ အဲဒီမှာ ဝယ်လို့ရတယ်။ ဆီဝယ်လို့ မရခဲ့ဘူး” ဟု ဒေါ်ချင်းက ဆိုသည်။
သူတို့ ရပ်ကွက်ဈေးတွင် ဟင်းသီးဟင်းရွက်များ ဝယ်ယူ၍ မရကြောင်း သူက ညည်းညူ ပြောဆိုသွားသည်။
မုန်တိုင်းသည် စနေနေ့ နံနက် လင်းအားကြီး ၂ နာရီတွင် စတင်တိုက်ခတ်ပြီး လေပြင်းများ အော်မြည်ပြီး မိုးသီး မိုးပေါက်ကြီးများလည်း ကျခဲ့သည်ဟု ဒေါ်ချင်းက ပြောသည်။ “ကျမတသက်မှာ အရင်က တခါမှ မကြုံဖူးပါဘူးရှင်”။
ဆိုင်ကလုံးမုန်တိုင်းကြောင့် သေဆုံးသူ ၅ သောင်း ကျော်သွားပြီး၊ လူပေါင်း ၄၁ဝဝဝ ပျောက်ဆုံးနေဆဲ ဖြစ်သည်။ ထို့ပြင် ရန်ကုန်နှင့် မြစ်ဝကျွန်းပေါ်တွင် လူများ သိန်းနှင့်ချီ၍ အိုးမဲ့အိမ်မဲ့ ဖြစ်ကျန်ခဲ့သည်။
ဆိုင်ကလုံးမုန်တိုင်း ဖျက်ဆီးအပြီး ရန်ကုန်မြို့သို့ ထွက်လာခဲ့သည့် လပွတ္တာမြို့မှ တက်ကြွ လှုပ်ရှားသူတဦးက တယ်လီဖုံးဖြင့် မဇ္ဈိမကို ပြောကြားရာတွင် သူတို့ မြို့နယ်တခုထဲတွင်ပင် အနည်းဆုံး လူ တသိန်းခန့် သေဆုံးခဲ့သည်ဟု ဆိုသည်။ သို့သော် အဆိုပါသတင်းကို သီးခြားအတည်ပြုချက် ပြုလုပ်နိုင်ခြင်း မရှိသေးပါ။
လမ်းများ သစ်ပင်များ၊ ဓါတ်တိုင်များ လဲကျ ပိတ်ဆို့နေဆဲဖြစ်ပြီး အိုးမဲ့အိမ်မဲ့ ဖြစ်သွားသူ အမြောက်အမြား ဘုရားကျောင်းများ၊ ဘုန်ကြီးကျောင်းများတွင် သွားရောက် ခိုလှုံနေကြရသည်။
“ကျမအိမ်က သောကြာနေ့က လေမုန်တိုင်းကြောင့် လုံးလုံး ပျက်သွားတယ်။ အမိုးတွေ လန်သွားတယ်။ အိမ်အဝင် ပင်မ အိမ်တိုင်ကြီးလည်း ကျိုးကျသွားတယ်” ဟု ယခုအခါ အင်းစိန်မြို့နယ် Full Gospel Church တွင် သွားရောက်ခိုလှုံ နေရသူ အသက် ၃၅ နှစ်ရှိ ကလေး ၃ ယောက်မိခင် လမ်ဘွန်း က မဇ္ဈိမကို ပြောသည်။
“ကျမ အိမ်နီးနားချင်းတွေဆီက နေ့တိုင်းတောင်းပြီး ဆန်ပြုတ်ပဲ သောက်နေရတယ်။ ကြမ်းပေါ်မှာ အိပ်နေရတယ်။ ကျမယောက်ျားက လေဖြတ်ထားတော့ ကျမလည်း ဘာမှလုပ်နိုင်ဘူးလေ။ ကလေးတွေကလည်း ငယ်သေးတယ်။ အငယ်ဆုံး ကလေးက အခုမှ ၁ဝ လပဲ ရှိသေးတယ်” ဟု သူက ပြောသည်။
“တမြို့လုံး ပျက်စီးသွားပြီ။ သစ်ပင်တွေအားလုံး လမ်းတွေပေါ် လဲကျနေတယ်။ မီးလဲပြတ်နေတယ်။ ကယ်ဆယ်ရေး အစီအစဉ်တွေလည်း မရှိဘူး။ အဆိုးဆုံးက ရေမရတာဘဲ။ အခြေခံ အဆောက်အဦတွေ ပြန်တည်ဆောက်ဖို့က လပေါင်း အတော်ကြာဦးမယ်” ဟု ရန်ကုန်မြို့ခံတဦးက အီးမေးလ်ပို့ကာ ပြောပြသည်။
အဓိက လမ်းမကြီးများကို ရှင်းလင်းပြီး ဖြစ်ကြောင်းနှင့် ဘတ်စ်ကားများ ပြန်လည် ပြေးဆွဲနေပြီ ဖြစ်ကြောင်း မြို့ခံများနှင့် မျက်မြင်သက်သေ အချို့က ဆိုသည်။ သို့သော် ဘတ်စ်ကားခများမှာမူ ၂ ဆကျော် မြင့်တက်ခဲ့သည်။
“၄ မိုင်ပဲဝေးတဲ့ အင်းစိန်က ၈ မိုင်လမ်းဆုံကို ကျပ် ၅ဝဝ ပေးခဲ့ရတယ်။ အရင်တုန်းက ပုံမှန် ၂ဝဝ ပဲ ပေးရတာ။ တက္ကဆီခတွေလည်း ကျပ် ၃ဝဝဝ လောက်ပေးရတဲ့ လမ်းကို အခု ၈ဝဝဝ အထိ ပေးနေရတယ်” ဟု ခရီးသွားတဦးက မဇ္ဈိမကို ပြောသည်။
မြူနီစီပယ် ရေးပေဝေမှုစနစ် ကောင်းမွန်စွာ လည်ပတ်ပြီး ရေပေးဝေနိုင်သည်ဟု မြို့ခံများက ပြောသည်။ သို့သော် အဓိက မြို့နယ်များတွင် ယခုထိ လျှပ်စစ်မီးများ ပြတ်တောက်လျက် ရှိသည်။
ရန်ကုန်အခြေစိုက် ပေါ်ပြူလာ ဂျာနယ်ကို ဗုဒ္ဓဟူးနေ့တွင် ပြန်လည် ထုတ်ဝေမည်ဟု ဂျာနယ် ဝန်ထမ်းတဦးက ပြောသည်။ ဂျာနယ်လုပ်ငန်းများ ပြီးသလောက် ဖြစ်နေပြီး ဓာတ်အားပေးစက် အသုံးပြုနေသည်။ သို့သော် ဂျာနယ်တိုက် အတွင်းတွင်မူ လူမရှိဘဲ ဟာလာဟင်းလင်း ဖြစ်နေသည်။
“အခုတော့ အယ်ဒီတာတွေလည်း မရှိဘူး။ သတင်းထောက်တွေလည်း မရှိဘူး။ သူတို့အားလုံး ဆိုင်ကလုံးကြောင့် ပေါ်လာတဲ့ သူတို့ ကိုယ်ရေးကိုယ်တာ ပြဿနာတွေနဲ့ပဲ အလုပ်ရှုပ်နေကြတယ်” ဟု အဆိုပါ အမျိုးသားဝန်ထမ်းက ပြောသည်။
Source
No comments:
Post a Comment