ချယ်ရီရသစုံမဂ္ဂဇင်း အမှတ် (၁၅၄) ဇွန်လထုတ် စာမျက်နှာ (၇) တွင် ပါရှိသော ဒီပရင်္ဂ ကဗျာကြောင့် အဆိုပါမဂ္ဂဇင်းမှ တာဝန်ခံအယ်ဒီတာနှင့် အမှုဆောင်အယ်ဒီတာတို့ အလုပ်မှ ရပ်နားခံလိုက်ရ ကြောင်း သိရသည်။
အဆိုပါကဗျာကို ကဗျာဆရာ ကြည်မောင်သန်းက ရေးဖွဲ့ထားပြီး ကဗျာပါ အကြောင်းအရာအချို့ကို လိုရာဆွဲတွေးကာ စာပေစိစစ်ရေးက အကြောင်းရှာခြင်းဖြစ်ကြောင်း ချယ်ရီမဂ္ဂဇင်းမှ တာဝန်ရှိသူ တဦးက ပြောသည်။
ကဗျာတွင် ဒီပဲယင်းမြို့ကို ကဗျာဆရာက အမွှမ်းတင်ရေးသားခြင်းဖြစ်သော်လည်း ဒေါ်အောင်ဆန်း စုကြည်နှင့်ပတ်သက်၍ စစ်အစိုးရက ဒီပဲယင်းတွင် အရေးအခင်းဖြစ်ခဲ့သည်ကို အကြောင်းပြုရေး သားခြင်းဖြစ်သည်ဟု စာပေစိစစ်ရေးမှစွပ်စွဲကာ ယခုကဲ့သို့ အယ်ဒီတာများအား အလုပ်မှ ရပ်နား ခိုင်းခြင်းဖြစ်ကြောင်း ၎င်းက ပြောသည်။
၂၀၀၃ ခု မေလ (၃၀) ရက်တွင် မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်နှင့် အန်အယ်လ်ဒီပါတီဝင်များ စည်းရုံးရေးခရီးစဉ်တွင် ဒီပဲယင်းမြို့၌ အကြမ်းဖက်သမားများအုပ်စု၏
ဝင်ရောက်ရိုက်နှက် တိုက်ခိုက်ခံခဲ့ရခြင်းဖြစ်သည်။
အလုပ်မှအနားပေးခြင်းခံရသည့် အယ်ဒီတာ (၂) ဦးမှာ တာဝန်ခံအယ်ဒီတာ ဒေါ်သပြေနှင့် အမှု ဆောင်အယ်ဒီတာ လင်းထိပ်သျှင်တို့ဖြစ်သည်။
ကဗျာဆရာ ကြည်မောင်သန်းက ၎င်း၏ကဗျာမှာ စာပေစိစစ်ရေးက ကျပြီးသားဖြစ်ကြောင်း၊ ၎င်းအား ခေါ်ယူစစ်ဆေးသည်ဆိုသည်မှာ မဟုတ်ကြောင်း၊ ကဗျာနှင့်ပတ်သက်၍ အယ်ဒီတာ (၂) ယောက်ကို အလုပ်ထုတ်လိုက်ခြင်းသာဖြစ်ကြောင်း ခေတ်ပြိုင်သို့ အတည်ပြုပြောကြားသည်။
“စာပေစိစစ်ရေးက သူ့အမှားနဲ့သူဆိုတော့ အယ်ဒီတာတွေကိုပဲ မဆီမဆိုင် အပြစ်ပေးလိုက်တာ” ဟု (၃၅) လမ်းမှ ၀ါရင့်သတင်းစာဆရာတဦးက ပြောသည်။
စာပေစိစစ်ရေးသည် သတင်းဂျာနယ်များ၊ မဂ္ဂဇင်းများတွင် ရေးသားသည့်စာများအား သေချာစွာ စိစစ်ဖတ်ရှုကာ အဓိပ္ပာယ်များကို ၎င်းတို့တွေးထင်မိသည့်အတိုင်း ပယ်ချခြင်းများ ပြုလုပ်လျက် ရှိသည်။
သို့သော် ဂျာနယ် မဂ္ဂဇင်းများ ထွက်ပြီးမှသာ အဓိပ္ပာယ်ပေါက်သည်များလည်း ရှိကြောင်း ပြည်တွင်း ဂျာနယ်အယ်ဒီတာတဦးက ပြောသည်။
ပြီးခဲ့သည့် ဇန်န၀ါရီလကလည်း ကဗျာဆရာစောဝေ၏ ချစ်သူများနေ့အထိမ်းအမှတ်အဖြစ် ရေးသား ဖော်ပြသော “ဖေဖော်ဝါရီဆယ့်လေး” ကဗျာ အချစ်ဂျာနယ်တွင် ပါရှိပြီး ဂျာနယ်ထွက်ပြီးမှသာ စာပေ စိစစ်ရေးက ကောက်ကာငင်ကာ အဓိပ္ပာယ်ဖော်ကာ ကဗျာဆရာစောဝေအား ဖမ်းဆီးအရေးယူခဲ့ခြင်း ဖြစ်သည်။
ထိုကဗျာတွင် “အာဏာရူးကြီး မှူးကြီးသန်းရွှေ” ဟု ယူဆရသည့် စကားလုံးများဖြင့် လှောင်ပြောင် သရော်ခဲ့သည်ဟု စွပ်စွဲကာ ကဗျာဆရာစောဝေကို နအဖအာဏာပိုင်များက ပုဒ်မ ၅၀၅ (ခ) ဖြင့် ဖမ်းဆီးကာ ပြီးခဲ့သည့် ဇန်န၀ါရီ (၂၂) တွင် တရားစွဲဆိုခဲ့ပြီး ယခုအခါ (၃) ကြိမ် ရုံးထုတ်ပြီး ဖြစ်သည်။
ကဗျာဆရာ ကြည်မောင်သန်းကိုလည်း ကိုစောဝေကဲ့သို့ ဖမ်းဆီးရန် အလားအလာရှိကြောင်း စာပေအသိုင်းအ၀န်းတွင် ထင်ကြေးပေးနေကြသည်။
ကဗျာဆရာ ကြည်မောင်သန်းမှာ ကလောင်မျိုးစုံဖြင့် နိုင်ငံရေးကဗျာများကို ရေးသားသူဖြစ်ကာ ယခင်က လှသန်း၊ လိပ်ပြာသန့်သန့် စသောကလောင်များဖြင့် ရေးသားခဲ့သည်ကို စစ်အစိုးရက black list လုပ်ထားခဲ့ပြီးနောက် ကြည်မောင်သန်း ကလောင်ဖြင့် ဆက်ရေးနေခြင်းဖြစ်သည်။
Source
No comments:
Post a Comment