ရခိုင်ပြည်နယ်တွင် နအဖ အာဏာပိုင်များက နာဂစ် လေဘေးအတွက်ဟုဆိုကာ ပထမ အနေဖြင့် အလှူငွေများကို ရခိုင်ပြည်သူများထံက ကောက်ခံခဲ့ပြီး ယခုအခါ ကျေးရွာ အုပ်စုလိုက် နွား၊ ကျွဲနှင့်စပါးများကို ခွဲတန်းချပြီး အတင်း ကောက်ခံနေသည်။
အမည်မဖေါ်လိုသူ ဘူးသီးတောင်မြို့နယ်မှ အရပ်လူကြီး တဦးက “သဘာဝက ဖန်တီးတဲ့ နာဂစ်ကြောင့် ကျနော်တို့ ပြည်သူတွေ သိန်းချီသေဆုံးပြီး သန်းချီ ဒုက္ခရောက်ခဲ့ကြရပါပြီ။ အခုလည်း ကျနော်တို့ ရခိုင်ပြည်သူတွေက နအဖဖန်တီးတဲ့ နာဂစ်ကြောင့် တော်တော် ဒုက္ခရောက်နေကြရပါပြီ။”ဟု ပြောသည်။
နအဖ စစ်အာဏာပိုင်များက ရခိုင်ပြည်နယ် တ၀န်းလုံးတွင် နာဂစ် တိုက်ခတ်ပြီးနောက်ပိုင်း လေဘေး ဒုက္ခသည်များအတွက်ဟုဆိုကာ တမြို့နယ်ကို ကျပ်ငွေ သိန်း သုံရာထက် မနည်းစီရဟုဆိုကာ အလှူငွေများကို အတင်းအဓမ္မ ကောက်ခံသွားခဲ့ပြီး ယခုအခါ ကျေးရွာ အုပ်စုအလိုက် ကျွဲ၊နွားများနှင့် စပါးများကို ခွဲတန်းချ ကောက်ခံနေသည်။
“သူတို့က မြို့နယ် မယက ဥက္ကဌကတဆင့် ကျေးရွာ ရယက ဥက္ကဌတွေကို ညွှန်ကြားပြီး ကျေးရွာအုပ်စု တအုပ်စုကို နွား သုံးကောင်နဲ့ စပါးတင်းပေါင်း ၅၀၀-စီ မပေးမနေရ ပေးရမယ် ဆိုပီး ကောက်ခံနေပါတယ်။ ဘူးသီးတောင်ပိုင်းက ကျေးရွာ အုပ်စုတွေဖြစ်တဲ့ ညောင်ချောင်း၊ သည်ကံခွဆုံ၊ စေတီတောင်၊ ဖုံညိုလိပ်စတဲ့ ကျေးရွာအုပ်စုတွေမှာ ခုလက်ရှိ ကောက်ခံနေ ပါတယ်။”ဟု အဆိုပါ အရပ်လူကြီး ကပြောသည်။
မောင်တောမြို့နယ်တွင် ကျွဲ၊ နွားနှင့်စပါး မပေးသွင်းနိုင်သော ကျေးရွာအုပ်စုများက ရယက ဥက္ကဌများအနေဖြင့် အိမ်ထောင်စုတစုစီက ကျပ်ငွေ ၄၀၀၀ စီကောက်ခံနေသည်။
အလားတူ ကောက်ခံမှုမျိုးကို ရခိုင်ပြည်နယ်အတွင်းမှ ရသေ့တောင်၊ ကျောက်တော်၊ ပေါက်တော၊ စစ်တွေ၊ မင်းပြား၊ ကျောက်ဖြူနှင့်မြေပုံ စသည့် မြို့နယ်များတွင်လည်း ပြုလုပ်နေသည်ဟု ဒေသအတွင်းကလာသော သတင်းများအရ သိရှိရသည်။
များမကြာမှီက တက်ကနက်မြို့ကို ရောက်ရှိလာသူ ခရီးသည်တဦးက “လူတွေ စီးပွားရေး အဆင်မပြေလို့ ငတ်သူငတ် သေသူသေ ဖြစ်နေတဲ့ အချိန်မှာ ခုလို အစိုးရ အာဏာပိုင်တွေက ငွေတွေကို အတင်း ကောက်ခံနေတဲ့အတွက် လူတွေက အထူး ဒုက္ခရောက်နေ ကြရပါပြီ။”ဟု ပြောသည်။
ရခိုင်ပြည်နယ်တွင် လယ်သမားများအနေဖြင့် လယ်ယာလုပ်ငန်းအတွက် လိုအပ်သော ဓါတ်မြေသြဇာ၊ အပ်ကိုင်းနှင့် တခြားပစ္စည်းများ ၀ယ်ယူရန်အတွက် ရှိစုမဲ့စု ရွှေ၊ ငွေများကို ပေါင်နှံရောင်းချပြီး ငွေကြေးများ စုဆောင်းနေရချိ်န်တွင် အာဏာပိုင်များက နာဂစ်လေဘေး အတွက် ငွေများ အတင်းစုဆောင်း ကောက်ခံနေသဖြင့် ရခိုင်ပြည်သူလူထု တရပ်လုံးမှာ မဖေါ်ပြနိုင်သော အခက်အခဲများနှင့် ရင်ဆိုင်နေကြရကြောင်း သတင်းများ ရရှိသည်။
Source
No comments:
Post a Comment