နာဂစ်မုန်တိုင်း အပြီး ၄ လကျော်သည်အထိ အကူအညီများလိုအပ်နေဆဲ

ကိုစိုး |

နာဂစ်ဆိုင်ကလုန်း မုန်တိုင်းဒဏ်သင့် ဧရာဝတီတိုင်း မြစ်ဝကျွန်းပေါ် ဒေသတချို့တွင် အကူအညီများ ယခုအချိန် အထိလိုအပ် နေဆဲဖြစ်ပြီး မိုးစပါးစိုက်ပျိုးရေးသည်လည်း အပြည့်အ၀ ဖြစ်ထွန်းအောင်မြင်မှု မရှိနိုင်ကြောင်း သိရ သည်။

မြစ်ဝကျွန်းပေါ် ဘိုကလေးမြို့နယ်ရှိ ငါးပြေမ ဒိုင်နယ်၊ ဟေမန် ဒိုင်နယ်၊ ပတ္တမြားကုန်း ဒိုင်နယ်၊ ပေါင်းတည် ဒိုင်နယ်၊ မရမ်းဒိုင်နယ်များရှိ ကျေးရွာများမှ လယ်ယာစိုက်ပျိုးရေးလုပ်ကိုင်သူများသည် မျိုးစပါး အခက်အခဲ၊ လယ်ယာ လုပ်သား ငှားရမ်းမှု အခက်အခဲ၊ လယ်ယာသုံး စက်ကိရိယာများ အချိန်မီ မရရှိသည့် အခက်အခဲများ ကြောင့် ယခုနှစ် မိုးစပါး စိုက်ပျိုးရေးမှာ ရာနှုန်းပြည့်မဖြစ်ထွန်းနိုင်ကြောင်း မကြာသေးခင်က ယင်းဒေသများသို့ သွားရောက် ကူညီထောက်ပံ့ရေးလုပ်ခဲ့သည့် အမျိုးသားဒီမိုကရေစီအဖွဲ့ချုပ်(အန်အယ်လ်ဒီ) ပြန်ကြားရေးအဖွဲ့ မှ ဒေါက်တာဝင်းနိုင်က ပြောသည်။

“အကြောင်းတွေကတော့ အများကြီးပေါ့၊ အချိန်မီ လယ်ထွန်စက်၊ လယ်ယာသုံးကိရိယာတွေမရတာ၊ မျိုးစပါး ကလည်း တခါက၂ ခါ ဆိုတော့ တချို့လည်း မတတ်နိုင်တာတွေ၊ ပထမတခါ စိုက်တယ်၊ မျိုးစပါးတွေက မအောင် ဘူး၊ ဒုတိယတခါ ကျိုးတိုးကျဲတဲပေါက်တယ် ဒီအတိုင်းပဲ ထားလိုက်ရတော့တာပေါ့၊ မတတ်နိုင်ကြတော့ဘူး၊ တချို့ ရွာတွေမှာ ထိုက်သင့်သလောက်ဖြစ်တာတော့ရှိတယ်၊ ကျနော်သွားခဲ့တဲ့ လှည်းဆိပ်ဖိုးညိုရွာဘက်ဆိုရင် မျိုးစပါး တွေ ကျဲတာ ၂ ကြိမ် ၃ ကြိမ်၊ လယ်ကွင်းမှာ တ၀က်လောက်ပဲပေါက် တယ်၊ ပတ္တမြားကုန်း ဒိုင်နယ်က ရွာတရွာ မှာလည်း ဧက ၃၀၀၀ လောက်စိုက်တာ ၁၀၀၀ ကျော်လောက်ပဲ ဖြစ် တယ်၊ ကျန်တာတွေက မဖြစ်ဘူး၊ အကုန် လုံး မြက်တွေချည်းပဲ”ဟု ဒေါက်တာဝင်းနိုင် က ပြောပြသည်။

ယင်းသို့ လယ်ယာစိုက်ပျိုးရေးလုပ်ငန်း ဆင်မပြေသောကြောင့် လယ်ယာလုပ်သား နေ့စားလုပ်ကိုင်သူများမှာ မြို့ပေါ်တက်၍ အလုပ်ရှာဖွေလုပ်ကိုင်ကြရရာ လယ်ယာလုပ်သား ငှားရမ်းမှု အခက်အခဲလည်းရှိကြောင်း သိရ သည်။

“ပြဿနာကတော့ လယ်သမားတွေက လယ်လုပ်ငန်းမကောင်းဘူး၊ အရင်းအနှီးကလည်း သိပ်မတတ်နိုင်ကြ တော့ တနိုင်တပိုင်လုပ်ကြတဲ့ အခါမှာ လယ်လုပ်သားတွေကို ငှားရတာ အခက်အခဲဖြစ်တယ်၊ လယ်လုပ်သားတွေ ကလည်း လယ်ပိုင်ရှင်တွေက အလုပ်သိပ်မပေးနိုင်တော့ နေ့စား ဘောက်သမားတွေက မြို့ပေါ်တက်ပြီး အလုပ် ရှာလုပ်ကြရတယ်၊ တချို့ ဧက ၈၀-၁၀၀ ရှိတဲ့ လယ်ပိုင်ရှင်တွေကလည်း အကုန်လုံးမလုပ် နိုင်ဘူး၊ သူတို့ ဒီတနှစ် တာ ရပ်တည်နိုင်ဖို့ကို ကြိုးစားစုဆောင်းပြီး လုပ်ကြရတာရှိတယ်”ဟု ဒေါက်တာ ၀င်းနိုင်က ပြောဆိုသည်။

လယ်သမားများမှာ ယခုအချိန် မျိုးစပါးထပ်မံရရှိမည် ဆိုပါကလည်း မိုးစပါးစိုက်ပျိုးရန် မဖြစ်နိုင်ကြောင်း လယ်သမားများက ၎င်းအား ပြောသည်ဟုလည်း ဒေါက်တာဝင်းနိုင်က ဆိုသည်။

“အခုနေ မျိုးစပါး ရမယ်ဆိုရင် တောင်၊ သက်ဆိုင်ရာ အဖွဲ့အစည်းတွေ အကြောင်းကြားရမှာနဲ့ သူတို့ကနေ တဆင့် အထက်အဖွဲ့အစည်းတွေ တင်ပြရမှာ နဲ့ ပြန်ယူမှာနဲ့ ဆိုတော့ ဒီမိုးကတော့ သူတို့ ထပ်ပြီးတော့စိုက်နိုင်ဖို့ ဆိုတာ မလွယ်တော့ဘူးတဲ့၊ ရှေ့နှစ် စပါးထွက်လာတဲ့အချိန်ကြရင်ဘယ်လိုဖြစ်လာမလဲ ဆိုတာ မသိသေးဘူးပေါ့၊ ဒါတွေကို ဘယ်လိုဖြေရှင်းမလဲ မေးတဲ့အခါ ဒီနှစ်ကတော့ ဒီအတိုင်းပဲ ပစ်ထားရမှာပဲတဲ့၊ တချို့လယ်ကွင်းတော့ ကောင်းတာတွေ့ရပါတယ်၊ ကျနော်တို့ အယူအဆအရ မိုးစပါးက အလွန်ဆုံးထွက်ရင်လည်း အရင်ကထက် တ၀က်လောက်ပဲ ထွက်နိုင်မယ်”ဟုလည်း လယ်သမားများကို ကိုးကား၍ ၎င်းက ပြောသည်။

ဘိုကလေးမြို့ပေါ်တွင်လည်း ဒုက္ခသည်စခန်းများ မရှိတော့ကြောင်း၊ ဒုက္ခသည်များမှာ နေရပ်ရင်းဒေသများသို့ ပြန်နေကြရကြောင်း၊ ၎င်းတို့၏ စားဝတ်နေရေးအတွက် WFP , Care Myanmar စသည့် အကူအညီပေးရေး အဖွဲ့များမှ ပုံမှန်ကူညီထောက်ပံ့မှုများရှိသော်လည်း မလောက်ငကြကြောင်း သိရသည်။

“ဥပမာ ၁၅ ရက်ကို ဆန် ၈ ပြည် နဲ့ ဆီ ၆၀ သား(တကီလို) လာပေးတာမျိုးတွေရှိတယ်၊ အလုံအလောက်တော့ မဟုတ်ဘူးပေါ့၊ တချို့လည်း နီးစပ်ရာ ဆွေမျိုးသားချင်းတွေဆီက ချေးငှား စားသောက်ရတာမျိုးတွေလည်း ရှိတာ ပေါ့၊ အရင်ထက်စာရင် ထိုက်သင့်သလောက် အကူအညီရကြပါတယ်”ဟု ဒေါက်တာဝင်းနိုင်က ပြောပြသည်။

မြစ်ဝကျွန်းပေါ် မော်လမြိုင်းကျွန်း မြို့နယ်ရှိ ကျေးရွာများတွင်လည်း ပုဂ္ဂလိက အလှူရှင်များအပါအ၀င် WFP , UNDP , World Vision , Save the Children , UNICEF အဖွဲ့အစည်းများက အကူအညီပေးမှုများရှိသော်လည်း လေဘေးသင့်ဒုက္ခသည်များမှာ အခက်အခဲများဆက်လက်ရှိနေပြီး ၎င်းတို့အား အကူအညီတောင်းခံသောကြောင့် သွားရောက် ကူညီထောက်ပံ့ပေးမှုများပြုလုပ်ခဲ့ကြောင်း အန်အယ်လ်ဒီ လေဘေးကယ်ဆယ်ရေး အဖွဲ့ ဥက္ကဌ ဦးအုန်းကြိုင်ကလည်း ပြောသည်။

စစ်အစိုးရ ၀န်ကြီးချုပ် ဗိုလ်ချုပ်ကြီးသိန်းစိန်က မုန်တိုင်းဒဏ်သင့် ဒေသများတွင် ကယ်ဆယ်ရေးလုပ်ငန်း များ ဆောင်ရွက်ပြီးစီးသောကြောင့် ပြန်လည် ထူထောင်ရေးလုပ်ငန်းများကို ဆောင်ရွက်ပေးလျက်ရှိသည်ဟု ပြောကြား ကြောင်း မေလ ၁၆ ရက်ထုတ် အစိုးရသတင်းစာများတွင် ဖော်ပြထားသည်။

လွန်ခဲ့သည့် မေလ ၂ ရက်နှင့် ၃ ရက်မှ စတင်၍ ဧရာဝတီ မြစ်ဝကျွန်းပေါ်နှင့် ရန်ကုန်တိုင်းတို့တွင် နာဂစ် ဆိုင်ကလုန်း မုန်တိုင်း တိုက်ခတ်ခံခဲ့ရသည်မှာ ၄ လ ကျော် ရှိပြီ ဖြစ်သည်။