ယမန်နေ့ စက်တင်္ဘာ ၉ ရက်နေ့မှာ ၆၉ နှစ်မြှောက် ဆရာတော် ဦးဥတ္တမနေ့ ဖြစ်သောကြောင့် ပြည်ပနိုင်ငံများမှာ သာမက စစ်တွေမြို့တွင်လည်း ဆရာတော် ဦးဥတ္တမနေ့နှင့် ပတ်သက်သော လှုပ်ရှားမှုများကို ပြုလုပ်ခဲ့ကြသည်။စစ်တွေမြို့ က ကျောင်းသားတဦးက “လူငယ် အတော်တော်များက မနေ့က ဆရာတော် ဦးဥတ္တမ ရုပ်ပုံပါတဲ့ တီရှပ်တွေကို ၀တ်ပြီး ဆရာတော်ကို ဂုဏ်ပြုခဲ့ကြပါတယ်။ လူတိုင်းလိုလိုက ဆရာတော် ဦးဥတ္တမနေ့မှာ ဆရာတော် ရုပ်ပုံပါတဲ့ တီရှပ်တွေကို ၀တ်ဆင်ရတဲ့ အတွက် ဂုဏ်ယူ မဆုံး ဖြစ်နေကြပါတယ်။” ဟုသူက ပြောသည်။
အဆိုပါ တီရှပ် အကျီင်္များကို ၀တ်ဆင်ပြီး စက်ဘီးစီးသူများ၊ ဆိုင်ကယ် စီးသူ အများအပြားကို စစ်တွေမြို့ လမ်းမကြီးတလျောက်တွင် မြင်တွေခဲ့ရသည်ဟု မျက်မြင် တဦးကလည်း အတည်ပြုပြောသည်။
၎င်းအပြင် စစ်တွေ တက္ကသိုလ်တွင်လည်း ကျောင်းသား ကျောင်းသူများက ဆရာတော် ဦးဥတ္တမ ရုပ်ပုံပါသော တီရှပ်များကို ၀တ်ဆင်ပြီး စစ်တွေ တက္ကသိုလ်တွင် ဆုတောင်းပွဲ ပြုလုပ်သဖြင့် လုံခြုံရေး တပ်ဖွဲ့ဝင်များက ၀ိုင်းထားခဲ့သည်။
ယမန်နေ့ ညနေ ၅ နာရီ အချိန်ထိ စစ်တွေမြို့သို့ ဖုံးဆက် မေးမြန်းခဲ့ရာ ကျောင်းသား တဦးက “တက္ကသိုလ်ထဲမှာ ဘာတွေ ဖြစ်နေတယ်ဆိုတာကို တိတိကျကျ ပြောဖို့ခက်ပါတယ်။ ကျောင်းကို ၀င်တဲ့ လမ်းကို အာဏာပိုင်တွေက ပိတ်ထားတဲ့အတွက် အထဲကို အ၀င်အထွက် လုပ်လို့ မရဘူး၊ ကျောင်းသား ၂၀၀ကတော့ အထဲမှာ ပိတ်မိနေတယ်ဆိုပြီး သတင်းတွေ ထွက်နေပါတယ်။ လူတော်တော်များကတော့ အခြေအနေ ဘယ်လိုရှိတယ်ဆိုတာကို ကျောင်းနားကို သွားပီးကြည့်နေကြပါတယ်။” ဟု ပြောသည်။
စစ်တွေ တက္ကသိုလ်တွင် ကျောင်းသား ၂၀၀ ခန့်ကို လုံခြုံရေး တပ်ဖွဲ့ဝင်များက ၀ိုင်းထားသဖြင့် ပိတ်မိနေကြောင်း သတင်းများ ထွက်ပေါ်နေသဖြင့် ကျောင်းသား မိဘများအကြား အထူးစိုးရိမ်နေကြောင်း စုံစမ်း သိရှိရသည်။
ရဟန်းတော်များကလည်း ဆရာတော် ဦးဥတ္တမနေ့ကို ဘုန်းကြီးကျောင်း တချို့တွင် ကျင်းပခဲ့ကြပြီး ဘာသာရေး ထုံးတမ်း စဉ်လာများနှင့် အညီ ဆရာတော်အတွက် ဆုတောင်း မေတ္တာပို့ အမျှပေးဝခဲ့ကြောင်း သိရှိရသည်။
ညနေပိုင်းတွင် ဆရာ ဦးမောင်ညို ဦးစီးပြီး ရဟန်းတော် အပါး ၃၀ နှင့် လူ ၅၀ ခန့်က ဆရာတော်ရုပ်ထုအား မီးပူဇော်ရန် အတွက် ဦးဥတ္တမ ပန်းခြံသို့ သွားရောက်ရာ လုံခြုံရေး တပ်ဖွဲ့ဝင်များက ဟန့်တားသဖြင့် မီးပူဇော်ရန် လာသူများနှင့် လုံခြုံရေး တပ်ဖွဲ့ဝင်များအကြား အခြေအတင် စကားများခဲ့ကြကြောင်း သိရှိရသည်။
နောက်ပိုင်းတွင် ဆရာတော်ဦးဥတ္တမ ပန်းခြံအား အာဏာပိုင်များက လုံခြုံရေး တိုးမြှင့်လိုက်ပြီး အ၀င်အထွက်ဂိတ်များကို ပိတ်ထားလိုက်ကြောင်း အမည်မဖေါ်လိုသူ လူငယ် တဦးက ပြောသည်။
လွန်ခဲ့သော စက်တင်္ဘာလ ၇ ရက်နေ့ ညနေကလည်း အမည်မသိသူများက စစ်တွေ လမ်းမကြီး၊ မိဇံရပ်ကွက်၊ မောလိပ်ရပ်ကွက် အပါအ၀င်နေရာ အတော်တော်များတွင် မှုတ်ဆေးဗူးများဖြင့် “စက်တင်္ဘာ ၉ ရက် ဆရာတော် ဦးဥတ္တမနေ့” ဆိုပြီး ရေးသားထားခဲ့ကြောင်း သိရှိရသည်။
စက်တင်္ဘာလ ၈ ရက်နေ့ နံနက်တွင် အဆိုပါ မှုတ်ဆေးဗူးများဖြင့် ရေးသားထားချက်များကို ရဲအဖွဲ့ဝင်များက မှုတ်ဆေး အမဲရောင်များဖြင့် ပက်ဖျန်းကာ ဖျက်ဆီးပစ်ခဲ့သည်။
သို့သော်လည်း မှုတ်ဆေးဗူးများဖြင့် ဖျက်ဆီးထားသည်ကို ထင်ထင်ရှားရှား လူတိုင်းမြင်တွေ့နေရကြောင်း မျက်မြင် တဦးက .ယခုကဲ့သို့ ပြောသည်။
“သူတို့က ဆေးဗူး အမဲတွေနဲ့ ဖျက်ပေမယ့် ဖျက်တဲ့နေရာတွေကို လူတွေက မြင်နေရတယ်။ မိဇံရပ်ကွက်ထဲက ဖျက်ထားတာဆိုရင် လမ်းသွားလမ်းလာတိုင်း ခုချိန်ထိ မြင်တွေ့နေရပါတယ်။”
စစ်တွေမြို့တွင် ယခင်နှစ်များကလည်း ဆရာတော် ဦးဥတ္တမနေ့ကို ပြည်သူများက ကျင်းပခဲ့ကြသော်လည်း ယခုနှစ်ကဲ့သို့ မဟုတ်ကြောင်၊ ယခုနှစ်တွင် ဆရာတော် ဦးဥတ္တမနေ့ကို အာဏာပိုင်များက လုံခြုံရေး အထူးတင်းကျပ်ထားသည့် ကြားထဲက မြို့သူ မြို့သား အများအပြား ပူးပေါင်းပါဝင်ပြီး ပေါ်ပေါ်ထင်ထင် လုပ်ဆောင်ခဲ့သဖြင့် စစ်အစိုးရ အပေါ် မကျေနပ်မှု တိုးပွားလာနေခြင်းကို ပြသနေခြင်းပင် ဖြစ်ကြောင်း အများက သုံးသပ် ဝေဖန်ပြောဆိုနေကြသည်။
Source
No comments:
Post a Comment