မဇ္ဈိမသတင်းဌာန Friday, 18 April 2008
နယူးဒေလီ။ ။ တရုတ် အိုလံပစ်ပွဲတော်ကို ဆန့်ကျင်သည့် တိဘက်များ၏ ဆန္ဒပြပွဲသို့ သွားရောက် သတင်းယူသည့် မြန်မာသတင်းထောက် ၄ ဦးသည် ယမန်နေ့ ညနေပိုင်းတွင် ဖမ်းဆီးခံခဲ့ရသည်။
နယူးဒေလီမြို့၌ အိုလံပစ်မီးတိုင် ရောက်ရှိနေချိန် မီးတိုင်ကို လက်ဆင့်ကမ်း သယ်ဆောင်သည့် အိန္ဒိယဂိတ်နှင့် ပါလီမန် အဆောက်အဦ လမ်းတလျှောက်တွင် ဆန္ဒပြ တိဘက်များနှင့် လုံခြုံရေး ရဲများအကြား ပဋိပက္ခဖြစ်ပွားပြီး တိဘက် ၅ဝ ကျော်ကို နေ့လည် ၂ နာရီခန့်တွင် စတင်ဖမ်းဆီးရာ မြန်မာသတင်းထောက် ကိုခင်မောင်လတ် (DVB)၊ ကိုမျိုးမြင့်အောင် (Khonumthung)၊ ကိုကျော်သူရ (BBC) နှင့် ကိုနေလင်း (RFA) တို့ပါ ဖမ်းဆီးခံခဲ့ရခြင်း ဖြစ်သည်။
သူတို့ကို ယနေ့နံနက် ၁ဝ နာရီခန့်အထိ ပါလီမန်အနီးရှိ Tuglak ရဲစခန်းတွင် ထပ်မံ ဖမ်းဆီးလာသည့် တိဘက် ၃ဝဝ ခန့်နှင့်အတူ ဆက်လက် ထိန်းသိမ်းထားပြီး တရားရုံး ထုတ်မည်ဟူသည့် သတင်းများလည်း ပေါ်ထွက်နေသည်ဟု မြန်မာသတင်းထောက် တဦးက ပြောသည်။
ယမန်နေ့က အိန္ဒိယရောက် မြန်မာ့ဒီမိုကရေစီ အင်အားစုများကလည်း တိဘက်လူမျိုး ၂ ထောင်ကျော်နှင့်အတူ နယူးဒေလီ မြို့လယ်တွင် ပူးပေါင်း ဆန္ဒပြကြသေးသည်။
တိဘက်များက နယူးဒေလီ မြို့ဟောင်းမှ မြို့လယ် ဂျန်တားမန်တား အရပ်သို့ အိုလံပစ် မီးတိုင်အတု တတိုင်ကို ကိုင်ဆောင်ကာ ချီတက်လာရင်း “တိဘက်လူမျိုးများကို သတ်ဖြတ်နေခြင်းမှ ရပ်တန့်ပါ”၊ “Free Tibet၊”၊ “ဒလိုင်းလားမား သက်တော်ရာကျော် ရှည်ပါစေ” ဟူသော ကြွေးကြော်သံများ အော်ဟစ်ခဲ့ကြသည်။
မီးတိုင်သယ်သည့် အိန္ဒိယဂိတ်နှင့် ပါလီမန် အဆောက်အဦ လမ်းမကြီးပေါ်သို့ ကြည့်ရှုသူ ပရိသတ်များနှင့် ဆန္ဒပြသူများ မဝင်သာစေရန် သံဆူးကြိုးအထပ်ထပ် ကာထားပြီး အိုလံပစ် မီးတိုင်ကို အနှောင့်အယှက်မရှိ သယ်ဆောင်နိုင်ရန်အတွက် အိန္ဒိယရဲ ၁ သောင်း ၈ ထောင်ခန့်က ဝန်းရံ ပေးခဲ့ကြသည်။
ဂရိနိုင်ငံ အေသင်မြို့မှ သယ်လာသည့် အိုလံပစ်မီးတိုင်သည် ယမန်နေ့က နယူးဒေလီမြို့သို့ ရောက်ရှိခြင်းဖြစ်ပြီး နေ့တွင်းချင်းပင် ထိုင်းနိုင်ငံ ဘန်ကောက်မြို့သို့ လေယာဉ်နှင့် ဆက်လက် သယ်ဆောင်သွားသည်။
အိုလံပစ်မီးတိုင်မှာ ၇၂ စင်တီမီတာ ရှည်လျားပြီး အလေးချိန် ၉၈၅ ဂရမ် ရှိသည်။
Source
No comments:
Post a Comment