ချင်းမိုင်။ ။ မန္တလေးတိုင်း အမရပူရမြို့နယ်ရှိ တောင်သမန်အင်းတွင် ဖြတ်ဆောက်ထားသည့် ဦးပိန်တံတားမှာ ပြီးခဲ့သည့် သင်္ကြန်အကြတ်နေ့တွင် လူများသဖြင့် ၀န်အားမနိုင်ဖြစ်ကာ ကျိုးကျသွားခဲ့သည်။
မဟာသင်္ကြန် ရက်များအတွင်း လာရောက် လည်ပတ်သူများ စည်ကားစွာ ရှိနေသည့် ဒုတိယ အကြတ်နေ့ ဧပြီလ ၁၅ ရက်နေ့တွင် ဦးပိန်တံတားမှာ ၀န်မခံနိုင်ဘဲ ကျိုးကျသွားခဲ့ခြင်း ဖြစ်သည်။
“တံတားက ကျိုးကျသွားတယ်။ လူကများတော့၊ တံတားကလည်း ဆွေးနေတော့ ဝိတ်မခံနိုင်ဘဲ ကျိုးကျတာလေ။ အလယ်လောက်က နှစ်ခန်းလောက် ကျိုးတာ။ အရှေ့ဘက် ဇရက်နှစ်ခန်း သုံးခန်းကြားမှာ ကျိုးသွားတယ်။ အဲဒီနေရာကို အခုအချိန်အထိ မပြင်ရသေးဘူး” ဟု မန္တလေး မြို့ခံတဦးက ပြောသည်။
ဦးပိန်တံတားသည် မန္တလေးမြို့တောင်ဘက် အမရပူရမြို့နယ်ရှိ တောင်သမန်အင်းကို ဖြတ်၍ တည်ဆောက်ထားကာ တံတားအရှည်မှာ ၁ ဒသမ ၂ ကီလိုမီတာ သစ်သားနှင့် ဆောက်လုပ်ထားခြင်း ဖြစ်သည်။
“ဘယ်သူသေတယ် ဆိုတာတော့ မကြားသေးဘူး။ အခုအချိန်အထိ ဘာမှ မလုပ်သေးဘူး။ လူတွေကတော့ နည်းနည်းလေးတော့ ထိခိုက်တယ်လို့ ပြောတာပဲ။ အခုအချိန်အထိ သွားလို့လာလို့ မရသေးဘူးဗျ” ဟု မန္တလေး ဒေသခံက ဆက်ပြောသည်။
ယခင်က တံတား တခုလုံးကို ကျွန်းတိုင်ကြီးများ၊ ကျွန်းသစ်များဖြင့်သာ ဆောက်လုပ်ထားခြင်းဖြစ်၍ ကမ္ဘာပေါ်တွင် အရှည်ဆုံးသော ကျွန်းသစ်လုံး တံတားအဖြစ် ကမ္ဘာလှည့် ခရီးသွားများကြားတွင် ထင်ရှားသည်။
ဒေသခံတဦးက “ကလေးတယောက် ပြုတ်ကျတယ် ကြားတယ်။ အပျက်အစီးတွေနဲ့ရောပြီး ကျသွားတာ။ သူ့အမကတော့ ပြာနေတာပဲလို့ တွေ့တဲ့လူတွေက ပြောကြတယ်။ ကလေး ဘာဖြစ်သွားလဲ၊ နောက်ဆက်တွဲတော့ မသိဘူး” ဟု ပြောသည်။
သူက ဆက်ပြီး “လူတွေကတော့ အရှေ့ဘက် အနောက်ဘက် သွားမယ်ဆိုရင် ရေတော့ ရှိသေးတယ်။ လမ်းလျှောက်သွားလို့တော့ မရသေးဘူး။ အင်းကြီးကို သွားချင်တယ် ဆိုရင်တော့ ပတ်လမ်းကနေ သွားတာပေါ့နော်။ နည်းနည်းတော့ ဝေးသွားတာပေါ့” ဟု ပြောသည်။
ဦးပိန်တံတားကို ၁၈ ရာစုခန့်က အင်းဝမှ အမရပူရသို့ မြို့တော် ပြောင်းရွှေ့ရာတွင် အင်းဝနန်းတော်မှ ကျွန်းတိုင်များကို အမရပူရ မြို့တော်ဝန်သို့ ပေးအပ်ခဲ့ရာ ယင်းသစ်လုံးများဖြင့် မြို့တော်ဝန်၏ စာရေး ဦးပိန်ဆိုသူမှ တံတား ဆောက်လုပ်ခဲ့ရာမှ အဆိုပါအမည် တွင်ခဲ့ခြင်း ဖြစ်သည်။
လှပသော သဘာဝပတ်ဝန်းကျင် ရှုခင်းများနှင့်အတူ ကျွန်းသစ်တိုင်လုံးပေါင်း ၁ဝ၆ဝ ဖြင့် ထူးခြားဘွယ် ဆောက်လုပ်ထားသည့် တံတားတခု ဖြစ်သောကြောင့် ကမ္ဘာလှည့် ခရီးသွားများအကြား ရေပန်းစားလှသည်။
Source
No comments:
Post a Comment