အောက်တိုဘာ ၂၉။ ရဲအောင်သော်
ကုမ္ပဏီဝန်ထမ်းနှင့် အစိုးရဝန်ထမ်းများမှာ ရရှိသော လစာငွေနှင့် လစဉ် ထမင်းဖိုး မလောက်ငသဖြင့် နယ်မှ လာရောက် အလုပ်လုပ်ရသူများနှင့် အဆောင်နေလိုသည့် လူငယ်များ အခက်အခဲတွေ့လျက် ရှိသည်။
ထမင်းချိုင့်ဆွဲ ဈေးနှုန်းများမှာ တစ်လ အနိမ့်ဆုံး နှစ်သောင်းမှ နှစ်သောင်းခွဲ သုံးသောင်းထိ မြင့်တက်နေသည်။ ထမင်းဆိုင်များတွင် တစ်ခါပြင် ဈေးအနည်းဆုံး ၈၀၀ ကျပ်မှ ၁၀၀၀၊ ၁၃၀၀၊ ၁၅၀၀ အစားစား ရှိသည်။ လစာ နှစ်သောင်းခွဲ သုံးသောင်းသာ ရသော ဘွဲ့ရ အလုပ်ဝင်စ လူငယ်များမှာ လစာကို မုန့်ဖိုးအဖြစ်သာ သုံးနိုင်ကြောင်း သိရသည်။
“လခက တစ်လ ငါးသောင်းဆိုရင်တောင် ချိုင့်ဆွဲစားရင် ထမင်းဖိုးကတင် တစ်ဝက်လောက် ကုန်နေပြီ။ ထမင်း ကိုယ့်ဟာကိုယ်ချက်။ ဟင်းက လက်ဖက်သုတ်စားလိုက်၊ တုတ်ထိုးတို့ အကြော်တို့နဲ့ စားလိုက် ဆိုရင်တော့ ချွေမိတယ်။ လခထုတ်ရက်လောက်ပဲ ဆိုင်က အသားဟင်း ဝယ်စားပေါ့။ ဖက်စပ်မှာ လုပ်တဲ့ ဝန်ထမ်းတွေကတော့ နယ်ကလူတွေဆို လခနည်းတဲ့ ကြားထဲက ဒီလိုပဲ အိမ်ကို ပို့ဖြစ်အောင် ပြန်ပို့တာပါပဲ”ဟု ကုမ္ပဏီဝန်ထမ်းဟောင်း တစ်ဦးက ပြောကြားသည်။
လမ်းဘေးပလက်ဖောင်းများတွင် စားပွဲနှင့် ခွေးခြေပုများ ချကာ ရောင်းချသော ညနေခင်း ဆိုင်များမှာ လခစား ဝန်ထမ်းများနှင့် နေ့စား အလုပ်သမားများ ပုံမှန် စားသောက်ကြသည်။ ကြက်၊ ဝက်နှင့် ထမင်း တစ်ခါပြင် ၈၀၀ ခန့်၊ ဘဲဥ၊ ချဉ်ပေါင်ကြော် ဟင်းများနှင့် ၅၀၀ ခန့် ပေးရသည်။ နံနက်စာ ထမင်းကြော် တစ်ပွဲမှာ ၄၀၀၊ ၅၀၀ ကျပ်အထိ ဖြစ်နေသည်။
“လခတက်ရင်လဲ ကုန်ဈေးနှုန်းက လိုက်လိုက်တက်နေတယ်။ ထမင်းဟင်းဖိုးရယ်၊ အဆောင်လခတွေရယ်၊ ဘတ်စ်ကားခရယ် ဈေးကျရင် ကောင်းမယ်”ဟု မိန်းကလေး တစ်ဦးက ပြောသည်။ ဖက်စပ် စက်ရုံများတွင် ဝန်ထမ်းများ အိုဗာတိုင်များများ ဆင်းချင်စေရန် အခြေခံ လစာကို ဈေးနှိမ့်ပေးထားပြီး အော်ဒါကျလျှင် ကျသလို ည ၁၀ နာရီ၊ ၁၁ နာရီထိ အိုဗာတိုင် ဆင်းကြရကြောင်း သိရသည်။
No comments:
Post a Comment