စွာကျယ်
နေပြည်တော်မှာရှုပ်ကုန်ပြီ။ ဟာ ဘာတွေရှုပ်တာလဲ။ နေပြည်တော်မှာလူတွေရှုပ်ကုန်ပြီ။ ကြပ်ပြေးလို့ ခေါ်တဲ့ဒေသက ရွာတွေကိုဖယ်ပြီး လမ်းတွေဖောက်၊ တိုက်တွေဆောက်၊ ရန်ကုန်က လူတွေရောက်လာလို့ လူတွေရှုပ်ကုန်ပြီလို့ပြောတာ၊ ဘယ်လိုလူတွေလဲ။ အများ သိတဲ့ အတိုင်း ရန်ကုန်က ဝန်ထမ်းလူတွေပေါ့။ မလာချင့် လာချင်၊ မပြောင်းချင် ပြောင်းချင်နဲ့ ရောက်လာကြတာ၊ ပြောင်းလာကြတာ။
ညနေရုံးဆင်းချိန်မှာ ရုံးဖယ်ရီကားတွေက ကြပ်ပြေးမြို့မဈေးမှာ ဈေးဝယ်ဖို့ နာရီဝက် ကားရပ် စောင့်ပေးတယ်။ အဲဒီမှာ ဌာနဆိုင်ရာဝန်ထမ်းတွေကို အမျိုးမျိုးအဖုံဖုံ၊ ဌာနအစုံ တွေ့ရတယ်။ အစိမ်းနု၊ အစိမ်းရင့်၊ အဝါနုအဝါရင့်၊ အနီနု အနီရင့်၊ အပြာနု အပြာရင့်စတဲ့ စိမ်းဝါနီပြာရောင် စုံဖြာတဲ့ ယူနီဖောင်း အရောင်အဆင်းတွေနဲ့ မြို့မဈေးရဲ့ သားငါးနဲ့ ကုန်စိမ်းဈေးတန်း၊ စားစရာရောင်းတဲ့ မုန့်ဆိုင်တွေမှာ နာရီဝက်အတွင်း ကြိတ်ကြိတ်တိုးပြီး အချိန်မီ အလုအယက်ဝယ်ခြမ်းရတဲ့ ဝန်ထမ်းတွေ။
ဟေ့လူ… ဒီမြင်ကွင်းကို ဘယ်လိုမြင်သလဲမေးတော့ ရန်ကုန်က ဟို… မြောက်ဥက္ကလာ၊ တောင်ဥက္ကလာနဲ့လှည်းတန်း၊ ကမာရွတ်၊ စမ်းချောင်းနဲ့ကြည့်မြင်တိုင်အပြင် ပုဇွန်တောင်၊ သာကေတနဲ့ ဒဂုံတောင်/မြောက်ပါ မကျန် အဲ့ဒီမြို့နယ်အစုံမှာ နေထိုင်ကြတဲ့ဝန်ထမ်းတွေကို ရန်ကုန်ကနေ ကန်ထုတ်လိုက်လို့ ဒီကို စုပြုံပြီး ရောက်လာကြတာ။ ရောက်တဲ့နေရာမှာ လုပ်ကြ၊ ကိုင်ကြ၊ ဈေးဝယ်ကြနဲ့ သွားစရာ၊ စားစရာ၊ နားစရာက ဒီမြို့မဈေးပဲရှိတာ။ ဌာနပေါင်းစုံက အမျိုးသမီးတွေ၊ အမျိုးသားတွေ၊ အသိမိတ်ဆွေတွေ၊ မမြင်ဖူးတဲ့သူတွေ၊ မြင်ဖူးတဲ့သူတွေ၊ မသိသေးတဲ့လူတွေ၊ သိဖူးတဲ့လူတွေ၊ တွေ့ကြ၊ မြင်ကြ၊ ပြောကြ၊ ဆိုကြ၊ နှုတ်ဆက်ကြနဲ့ ရန်ကုန်က ဒုက္ခသည်အစုံ လာဆုံတဲ့ဒီနေရာ ကြပ်ပြေးမြို့မဈေး၊ ဒီနေရာမှာ လူတွေရှုပ်ကုန်ပြီ။
အဲ… ကြပ်ပြေးနေပြည်တော်ကို ရောက်လို့မှ မကြာသေးဘူး ထပ်ရှုပ်ကုန်ပြန်ပြီ။ ဘာတွေ ရှုပ်ဦးမှာလဲ၊ ဇာတ်လမ်းတွေ ရှုပ်ကုန်ပြီ။ ရှုပ်လား၊ မရှုပ်လား ဟော… ကြည့်ပါဦး။ နေပြည်တော် စည်ပင်သာယာရေးကော်မတီက ရုံးအမိန့်ထုတ်ရပါပြီ။ ဘာလို့ ဒီအမိန့်ထုတ်ရတာလဲ လို့မေးတော့ ဟို… ဟို… တပ်ချုပ်ကြီးထံ ဝန်ထမ်းအပျိုတွေဆီက တိုင်စာရောက်လို့တဲ့။ ဝန်ထမ်းအိမ်ရာ ဝန်ထမ်းမိသားစုအဆောင်တွေမှာ လူပျို၊ အပျိုတွေ၊ ဝန်ထမ်းမိသားစုတွေ၊ လူလွတ်တွေရောပြီး အခန်းနေရာချထားပေးလို့ လူပျို၊ အပျိုတွေနဲ့ လူလွတ်တွေရဲ့ ဇာတ်လမ်းပေါ့။ လူလွတ်ဆိုတာ ဘာကိုပြောတာလဲ။ ဟာဗျာ… လူလွတ်ဆိုတာ ဇနီးမယားကို ရန်ကုန်မှာထားခဲ့တဲ့ အမျိုးသား။ ဒီမှာ တယောက်တည်း လွတ်လပ်နေတဲ့လူ၊ လွတ်နေတဲ့လူ၊ လူလွတ်ပေါ့ဗျာ။ အဲ့ဒီလိုပဲ အမျိုးသမီးတွေကလည်း သူတို့ရဲ့ခင်ပွန်းယောက်ျားကို ရန်ကုန်မှာ ထားခဲ့ရတဲ့ အမျိုးသမီး လူလွတ်၊ ဘယ်လိုရှုပ်ကုန်ကြတာတုန်း။
ဘယ်လိုရှုပ်ကုန်တာတုန်းလို့မေးရင်တော့ မဖြေတတ်ဘူးဗျာ။ လူပျိုအပျို၊ အမျိုးသားလူလွတ်၊ အမျိုးသမီးလူလွတ်၊ အဲ…လေးပွင့်ဆိုင်တော့ လွတ်ချင်သလို လွတ်နေကြမှာပေါ့ဗျာ။ အဲ… အချို့က ထမင်းလခပေးစားရင်း အသွားအလာများကြသတဲ့။ ဒီတော့ နေပြည်တော် မြို့တော်ဝန် ဗိုလ်မှူးကြီး သိန်းညွန့်ဆိုတဲ့ လူက ကိုယ်တိုင်လက်မှတ်ထိုးပြီး (၁၄.၇.၂ဝဝ၈) ရက်စွဲပါ စာအမှတ် ဝဝ၈/ဝ၈/နပတ (မတဝ) နဲ့ ထုတ်တဲ့ ရုံးအမိန့်စာ အဲဒီအမိန့်စာမှာ… အကြောင်းအရာက နေပြည်တော်စည်ပင်သာယာရေးကော်မတီနယ်မြေရှိ အစိုးရအိမ်၊ အိမ်ခန်းတွင်နေထိုင်ခွင့်ရရှိသူများ လိုက်နာရန် စည်းကမ်းချက်များ ထပ်မံဖြည့်စွက်ခြင်းတဲ့။ နိုင်ငံတော်အကြီးအကဲရဲ့လမ်းညွှန်ချက် အရဆိုပြီး အချက် (၄) ချက်ကို ထပ်မံဖြည့်စွက် ထုတ်ပြန်ခဲ့တယ်။
အရပ်စကားနဲ့ပြောရရင် နံပါတ် (၁) အိမ်ထောင်သည်လိုင်းမှာ အပျိုလူပျိုများအပြင် လူလွတ်တွေပါ မနေရတော့ဘူးတဲ့။ နံပါတ် (၂) အိမ်ထောင်သည်လိုင်းမှာနေတဲ့ အမျိုးသားဝန်ထမ်းတွေက မိသားစုမခေါ်လို့ရှိရင် အိမ်ထောင်သည်လိုင်းထဲမနေရဘူး၊ လူပျိုလိုင်းလည်းမနေရဘူးတဲ့။ အပြင်မှာ မိမိအစီအစဉ်နဲ့ ငှားရမ်းနေရမယ်တဲ့။
ဒါပေမယ့် အမျိုးသမီးတွေကျတော့ မိသားစုမခေါ်ရင် ဘယ်လိုနေရမယ်လို့တော့မပါဘူး။ နံပါတ် (၃) အချက်က ဝန်ထမ်းအိမ်ရာမှာ ရုံးခန်းဖွင့်တာတို့၊ မူကြိုဖွင့်တာတို့၊ ကျူရှင်ဖွင့်တာတို့ မလုပ်ရဘူးတဲ့။ အဲဒီ နံပါတ် (၃) အချက်က အပိုထည့်လိုက်တဲ့သဘောပါ။
အဓိက နံပါတ် (၁) နဲ့ နံပါတ် (၂) အချက်ပေါ့ဗျာ။ အဲဒါက စောစောကပြောတဲ့ လူတွေ ရှုပ်ကုန်ပြီဆိုတဲ့ အချက်ကို ဟန့်လိုက်တဲ့အဓိပ္ပာယ်ပဲ။ ကျနော်တို့ လူပျိုတွေကို အပျိုဆောင် မသွားပါဘူးလို့ ဒီနေ့ရုံးခန်းမှာ ခံဝန်လက်မှတ်ထိုးရတယ်။ ကဲနေကြတဲ့ လူလွတ်တွေကြတော့ မပါဘူးလေ။ အဲဒါကြောင့် သူတို့ကို ဒီလိုရုံးအမိန့်စာ ထုတ်ရတာဖြစ်မှာပေါ့လို့ ရုံးတွေမှာ ပြောသံကြားရပြန်တယ်။
ဒီအချက်တွေကိုကြည့်ရင် အပျိုလူပျိုတွေ၊ လူလွတ်တွေဟာ အချင်းချင်း ဒါမှမဟုတ်၊ အိမ်ထောင်သည် လိုင်းသားလိုင်းသူတွေနဲ့ ရှုပ်နေလို့ ခွဲထုတ်တဲ့သဘောပေါ့ဗျာ။ အပျိုလူပျိုတွေကို မပြောလိုပေမယ့် စောစောက ပြောတဲ့လူလွတ်တွေ၊ တော်တော်ကဲတဲ့ အမျိုးသားဖိုးကဲတွေနေမှာပေါ့ဗျာ။ ဇနီးမယားကို ရန်ကုန်မှာထား၊ နေပြည်တော်ကြပ်ပြေးမှာ တယောက်တည်း လွတ်လပ်နေတဲ့လူ၊ လွတ်နေတဲ့လူ၊ လူလွတ်ဆိုတဲ့ လူတွေကို ကြိမ်းမောင်းလိုက်တာပေါ့ဗျာ။
ဒီလူလွတ်လူကဲတွေက ကြပ်ပြေးနေပြည်တော်ရောက်စက ကျန်ခဲ့တဲ့ဇနီးမယားတွေဆီ၊ အလျှိုအလျှို ရုံးပိတ်ရက်မှာ လှစ်ကနဲလှစ်ကနဲပြန်ကြတာ။ ဟော… ကြာလာတော့ စရိတ်ကုန်၊ ဇလုံပွန်းလာပြီလေ။ အဲဒီတော့ စရိတ်အကုန်မခံနိုင်တော့လို့ နေပြည်တော်မှာပဲ ဇလုံပွန်းကြတာနေမှာ ပေါ့ဗျာ။ ဟုတ်တယ်… အဲဒါကြောင့် '“နေပြည်တော်မှာရှုပ်ကုန်ပြီ” လို့ ပြောတာကိုး။
အဲ… နောက်ဆုံးနံပါတ် (၄) အချက်ကတော့ အမိန့်ညွှန်ကြားချက်ကို မလိုက်နာရင် မင်းတို့တတွေ တိုက်ခန်းကဖယ်ကြတဲ့။ ကြပ်ပြေးနေပြည်တော် မြို့တော်ဝန်ရဲ့အမိန့်တော် ဒူ… ဝူ… ဝူ… ဝူ။
No comments:
Post a Comment